Rini Puspo : KADHOKU

kanggo Bp. Suparto Brata
Ing tanggap warsa ka-78, tgl 27 Pebruari 2010

Amung tembung kang dadi pisungsung
dudu kembang mawar abang
awit kembang mawar abang
duweke kanoman kang lagi kasmaran

amung tembung kang dadi pisungsung
dakulungake saka kadohan
ing pangajap bisaa dadi sesulih
sakalir rasa kang tumpuk undhung

najan amung tembung kang dakduweni
nanging iku prentule ati
mula tampanana kanthi legawa
sapa ngerti bisa ndhudhah nostalgia mangsa kawuri
nalika urip kasangsaya
nalika adus kringet mbela negara

kang dakelingi tembungmu:
mendhak mendhukule kahanan
iku pasrening panguripan
ngelak lan luwe
iku winih kang sinebar
bakal thukul, ngrembuyung, ngembang,
banjur awoh dadi woh kabagyan lan kawicaksanan

matur nuwun, bapa
wis kok parengake nyinaoni ilmu
kang ora kamot ing kamus lan ensiklopedi

lan saiki
amung tembung kang dadi pisungsung
dudu kembang mawar abang
awit kembang mawar abang
duweke kanoman kang lagi kasmaran.

Salatiga, Pebruari 2010.

Dikutip dari:
Majalah Panjebar Semangat No.12
20 Maret 2010 halaman Taman Geguritan.

Posted by admin on Wednesday, March 17th, 2010. Filed under Uncategorized. You can follow any responses to this entry through the RSS 2.0. You can leave a response or trackback to this entry